كيف تصنع تعاسة فاخرة بيديك في 30 يوم

إلى كل شخص مخه بيشتغل ضدّه 24ساعة يوميًا...أهلاً بيك.

بسم الله الرحمن الرحيم

أولا السلام عليكم ورحمة الله وبركاته

هدخل في الموضوع علطول عشان حرفيا جيه في دماغي و انا بذاكر ف مفيش مقدمات و الشغل دا احنا بقينا اهل 😊

---

فيه حاجه غريبة بتحصل للبني آدم، إنه ممكن يصحى من النوم الصبح، يبص للسقف كدا خمس دقايق، وبعدين يقول:

“أنا بعمل ايه في حياتي؟”

والموضوع يبدأ عادي جدًا، بعدها بشوية تلاقيه قاعد يشرب شاي حزين، ويبص للبلكونة كأنه بطل مسلسل تركي، وبعدها يدخل يشتري حاجات أونلاين هو أصلًا مش محتاجها، أو ياكل وهو مش جعان، أو يقلب في الريلز لحد ما عقله يتحول لعجينة سمبوسك.

والمشكلة؟

إنه فاكر إن ده “مود” وهيعدي.

لا يا حبيبي، دي حالتك النفسية وهي بتقولك:

“إحنا داخلين على انهيار محترم، شد حيلك.”

الفكرة إن الإنسان طول ما هو فاهم هو عايز ايه، ورايح فين، وعارف ليه بيعمل الحاجة، بيكون متماسك نسبيًا. إنما أول ما المعنى يختفي… خلاص، المخ بيبدأ يشتغل بنظام:

“يلا بينا نخرب الدنيا.”

يعني واحد مثلًا شغال شغلانة بيكرهها، ومش طايق الناس اللي فيها، وكل يوم بيروح الشغل كأنه رايح يحارب التتار، طبيعي جدًا بعد فترة يبقى عصبي، متوتر، وشاكك إن الكون كله متآمر عليه.

تيجي تقوله مالك؟

يقولك:

“أصل الناس مستفزة.

”

لا يا معلم، الناس مستفزة فعلًا لاأنكر(أستغفرالله)، بس مش للدرجة دي. المشكلة إنك من جواك أصلًا مستنزف.

إحنا من وإحنا صغيرين بنسمع كلام يبرمجنا من غير ما ناخد بالنا.

“إنت غبي.”

“إنت فاشل.”

“بص ابن خالتك.”

ابن خالتي ده لو كان عايش معايا كان انتحر والله من كتر المقارنات.

المهم إنك تكبر، وتفضل شايل الكلام ده جواك كأنه ملف محفوظ في المخ. تيجي تدخل أي تجربة جديدة، يطلعلك صوت داخلي ابن حلال يقولك:

“إنت فاكر نفسك هتعرف؟ ده إنت آخرك تعمل بطاطس محمرة و بتتحرق.”

وأنت تصدقه… بمنتهى السذاجة.

أخطر حاجة بقى هي كلمة “أنا”.

أصل الناس بتحب تقول:

“أنا عصبي.”

“أنا فاشل.”

“أنا مكتئب.”

يا ابني ما تهدى.

المشكلة إن مخك بياخد الكلام ده بجد جدًا، ويقولك:

“تمام، طالما إحنا عصبيين، يلا نزعق لأي حد يتنفس جنبنا.”

العقل البشري عامل زي الموظف المطيع أوي، أي كلمة تكررها قدامه ياخدها أوامر.

تقوله “أنا فاشل” يفتحلك كل ملفات الفشل من سنة 2009 لحد النهاردة.

يفكرك بالموقف اللي وقعت فيه قدام الفصل، واليوم اللي نسيت فيه اسمك في الشفوي، والمرة اللي سلمت على حد وهو أصلًا مخدش بالو و مردش عليك.

وبعدين تيجي تقول:

“مش عارف ليه ثقتي بنفسي وحشة.”

عشان إنت شغال جلد في نفسك 24 ساعة يا فندم.

والناس بقى عندها هواية عظيمة اسمها “المقارنة”.

يقعد يقارن نفسه بأي حد معدي.

يشوف واحد غني يقول:

“إشمعنى هو؟”

يشوف واحد حلو يقول:

“وأنا كأني بطاطساية محشية هم.”

يشوف حد ناجح يقول:

“أكيد عنده واسطة.”

ما يمكن تعب يا جماعة؟ ما يمكن الراجل شقي بدل ما هو قاعد يحقد على خلق الله؟

المضحك إن الإنسان أحيانًا يبقى عنده نعم كتير جدًا، بس مركز على الحاجة الوحيدة اللي ناقصاه، وكأن حياته كلها بايظة بسببها.

وده يخليه عايش طول الوقت في توتر واحتقان، لحد ما يبقى داخل أي نقاش عايز يرزع الترابيزة في الحيط.

والهروب بقى؟ حدث ولا حرج.

واحد يدخن عشان “يفصل”.

واحد ياكل وهو مخنوق.

واحد يقعد يشتري حاجات من أمازون كأنه هيفتح فرع كارفور.

واحد يتفرج على فيديوهات قطط ساعتين عشان ينسى إن عليه شغل متراكم من عصر المماليك.

كل ده هروب.

لأن الإنسان لما يتعب نفسيًا، بيهرب من نفسه بأي طريقة.

وبعدين نيجي للجزء العظيم…

“أنا بكره نفسي.”

ودي جملة لما بسمعها بحس إن المخ قاعد في الركن بيعيط.

يا ابني ما تهدى، إنت عايش مع نفسك طول العمر، يعني حتى لو كارهها استحملها شوية، دي مش شقة إيجار هتسيبها وتمشي.

الحقيقة إن أغلب الناس محتاجة تتعلم تتعامل مع نفسها باحترام شوية.

تبطل شتيمة في نفسها، تبطل مقارنة، تبطل جلد ذات، تبطل تعيش دور الضحية أكن الكون كله متفق عليه.

والأهم… تبطل تستنى الحياة تبقى مثالية عشان ترتاح نفسيًا.

لأن الحياة أصلًا عمرها ما هتبقى مستقرة 100%.

كل شوية فيه مشكلة، ضغط، خوف، قلق، فواتير، ناس مستفزة، وإنترنت بيفصل وقت الامتحان.

لكن الفرق الحقيقي بين شخص والتاني، إن فيه واحد كل ما يقع يقول:

“خلاص أنا فاشل.”

وفيه واحد يقول:

“ماشي، كانت وقعة بنت لذينة… بس يلا نكمل.”

وأنت مش محتاج يبقى خارق ولا مثالي، هو بس محتاج يعرف إن مخه مش عدوّه، وإن الكلام اللي بيقوله لنفسه كل يوم ممكن يبنيه… أو يوديه في داهية بمنتهى الاحتراف.

---

●شكرا لحسن استماعكم، لو مخك بدأ يفكر زيادة بعد المقال دا …انا مليش دعوة 😆

و ربنا يبعد عنا الأوفر ثينكينج اللي بيخلينا نفتكر موقف محرج حصل و احنا عندنا ٨سنين قبل النوم مباشرة .